Prof. Mbarawa aitaka TEMESA kufanya kazi kwa uadilifu mkubwa

Waziri wa Ujenzi, Uchukuzi na Mawasiliano Profesa Makame Mbarawa, amewataka watendaji na wafanyakazi wote wa Wakala wa ufundi na umeme (TEMESA), kufanya kazi kwa umoja, uwazi na uadilifu ili kufikia malengo yaliyokusudiwa na kuhuisha ustawi wa wakala huo. 

 

Kwa mujibu wa taarifa iliyotolewa na kitengo cha mawasiliano cha wizara hiyo, Waziri aliyasema hayo wakati akitoa mwelekeo wa utendaji wa wakala huo akizungumza na watendaji wa TEMESA.

 

Alisema Serikali ya awamu ya tano inaitaka TEMESA kufanya kazi kwa weledi ili kuongeza mapato na kuhudumia wateja wao  kikamilifu ili kuinua uchumi wa wakala huo na kuondoa malalamiko kwa wadau na watumishi.

 

‘Acheni kufanya kazi kwa upendeleo na usiri kwani huo ndio mwanzo wa hujuma na ubadhirifu hali inayochochea malalamiko na kudumaza huduma za TEMESA,” alsiema Profesa Mbarawa. 

 

Profesa Mbarawa aliitaka TEMESA kuhakikisha inatengeneza magari ya wadau wote kwa wakati na kutoa huduma za vivuko kwa ufanisi na kujiepusha na vitendo vya rushwa ili kukuza mapato na kuboresha huduma za ufundi na umeme.

 

Kwa upande wake, Katibu mkuu wa Wizara ya Ujenzi, Uchukuzi na Mawasiliano sehemu ya ujenzi, Mhandisi Joseph Nyamhanga  aliitaka TEMESA kuongeza bidii Katika kukusanya madeni yake ili ipate uwezo wa kibiashara na hivyo kumudu ushindani wa kibiashara. 

 

Mtendaji mkuu wa TEMESA Mhandisi, Marceline Magesa alimhakikishia Waziri  Mbarawa kuwa TEMESA inaendelea na mkakati wa kujenga vivuko vipya viwili ili kuongeza huduma hiyo katika eneo la Magogoni jijini Dar es salaam na Pangani mkoani Tanga.

 

Aidha, alimhakikishia waziri kuwa ukarabati wa vivuko unazingatiwa na uboreshaji wa karakana unaendelea ili kuvutia wadau wengi kutengeneza magari yao katika karakana hizo.

 

Wakala wa Ufundi na Umeme TEMESA ulianzishwa mwaka 2006 kwa lengo la kusimamia huduma za ufundi, umeme na usimamizi wa vivuko ambapo hadi sasa takriban vivuko 28 vinasimamiwa na wakala huo nchini kote.

  BY Lios Media