Majaliwa afurahia matibabu bure wazee mkoani Ruvuma

 Waziri Mkuu, Kassim Majaliwa, amesema amefarijika kuona wazee wanapata huduma za matibabu bure na kwa utaratibu mzuri katika hospitali ya Mkoa wa Ruvuma.

 

Waziri Mkuu alitoa pongezi hizo wakati akizungumza na madaktari, wauguzi na watumishi wa hospitali hiyo katikati ya wiki wakati wa ziara yake mkoani humo.

 

Majaliwa alisema utaratibu wa kutenga chumba maalum chenye madaktari wawili kwa ajili ya kuhudumia wazee unaotekelezwa hospitalini hapo, umeondoa adha ya kusubiri matibabu kwa muda mrefu kwa rika hilo.

Alisema hospitali ya Mkoa wa Ruvuma imethibitisha kwamba agizo la kutaka hospitali zote za Serikali  nchini ziwe na dirisha maalum kwa ajili ya wazee na  watibiwe bure, linatekelezeka na kuzitaka hospitali zote nchini kuiga mfano huo.

 

“Hospitali zote nchini ziige mfano wa hospitali ya  Mkoa wa Ruvuma kwa kuwaheshimu wazee wanaokwenda kutibiwa katika hospitali hizo kwa kuanzisha dirisha maalum kwa ajili yao; kama agizo la serikali linavyosema na wasitozwe malipo ya aina yoyote” alisema Waziri Mkuu.

 

Aidha, Majaliwa alishauri uwekwe utaratibu wa kuwapa kipaumbele wazee wanapokwenda kuchukua dawa ili wasisubiri kwa muda mrefu. 

 

Awali, Waziri Mkuu alitembelea chumba maalum cha wazee ambapo alipata fursa ya kuzungumza na Antonia Moyo, ambaye alisema hajawahi kutozwa fedha wala kukaripiwa wakati wote alipofika hospitalini hapo kwa ajili ya matibabu kupitia dirisha la wazee.

 

Waziri Mkuu Majaliwa pia ametembelea wodi mbalimbali, chumba cha upasuaji na duka la dawa kwa wagonjwa wanaotumia huduma za Bima ya Afya.

                        Waziri mkuuu Kasim Majaliwa Kasim by Lios Media